العصفور الطنان وعم سمعان الغلبان

طلع العصفور الطنان من اول النهار على مدينه الريحان الملايانه ورد اشكال الوان يتنقل بين الورود يشم الرحيق لكنه بيفكر وهو فى ضيق مع انه حر طليق و يقول لنفسه

:{ انا اصغر الطيور قد حبــه الريحان.....ليه ياربي خلقتني كده ضعيف خفيف زى الطيف باكل الرحيق زى النحل بــس ماليش فايده ولانفع لابطلع عسل ولابعمل ليف..قاعد ارفرف وارفرف جناحي مابيرتحش!بطير هنا وهناك ماليش عش. اهرب من حدايه وصقر واستخبى كمان م النسر .وحيد وحزنان وقلبي حيران ليه ماخلقتنيش انسان؟؟مافي حيوان يقدر عليه الكل عبيد ليه والممالك تحت ايديه..اديته سلــــطان ،يابخـتك ياانسان...ياريتني اكون انسان مش عصفور طنان }.

سمعه ابو الخيل عم حصان وهو بيكلم نفسه عند شجر البرتقان وف تحذير قال كمان

:{راح يجي يوم وتندم وتقول شكراَ على اللي خلقتني عليه}رد العصفور الطنان:{ انت غيران لانك معاشر الانسان وبياخدك رفيق كمان} قال الحصان:{لو تعرف حقيقه الانسان كان يصعْب عليك يا طنان },الطنان:{عليه انت بتكدب مش عايزني زيك اجرب..راح اروح لعالم الانسان واشوف طفل م السكان اكون صاحبه ويعملي عش كمان},الحصان:{اوعى تروح لعالم الانسان راح تندم ياطنان هناك الضعيف ماله مكان}.حزن الطنان وقال:{لازم اكون قوي زي الانسان}. وفجاءه مر فوج من السمّان واسراب هربانه م الحمام وطيور غريبه على كل الالوان..سألهم الطنان: {حصل ايه ؟؟!}ردوا فى نفس واحد:{الله يسامحه الانسان هدم الاشجار وبيوتنا كمان وعشنا اللي عايشين فيه بامان عشان شويه فلوس ترضي رغاباته..الشيطان!!}.

الحصان

:{شوفت ياطنان اشكر ربك على حنانه وعدم خلقك انسان}،الطنان:{مش هتنازل عن امنيتي .ارجوك ساعدني اكون انسان وساعتها تبقى رفيقي طول الزمان}.

فضل الطنان يسأل في الحاح وابو الخيل عم حصان الحكيم عارف انه هيرمي نفسه فى جحيم

سمع تعلوب الطنان وقال

:{انا جعان..هضحك عليه بكلمتين ولو انه مش هيخلني شبعان اهو تصبيره لحد ماألاقي طير مليان}فقرب وقال للطنان:{انزل دلوقتي طلبك عندي حله فى يدي}وقبل مايرد الطنان فات الزنان كده كانوا بيسموها ست نحله ملكه مدينه الريحان دخلت بطّن وعماله بتزن{زن زن زن...اوعى تنزل ياطنان راح ياكللك فى الحال طلبك هقول هولك وغرضك هوصل هولك مش محبه مني ولا من طيبه قلبي مادام هتسيب لي وردي اشم رحيقه براحتي من غير منقارك مايخلص اكلي،عليك والساحر ابو بنْور حارس مدينه النور الطير مالك الحزين في الجبل المسحور اسأل عليه الزهور هيدلوك عليه بالشوك المنطور بس ده لو عمرك هيطول وقدرت تنجى من النسور}.

شكر النحله وشد الهمه وودع الرفقه واخد حاله وبدأ ترحاله في طريق الجبل المسحور ومهما كانت تقابله نسور كان يلف ويدور يستخبى بين الشقوق ويطلع لفوق ساعة الشروق ويسأل الزهور عن مكان ابو بنْور،طريقه بلا نهايه وخاف يرجع للبدايه بص حواليه لاقى الدنيا فاضيه عليه

..وفجأه لفت نظره هناك في شق صغير حنب الحجر المجيّر زهره بريـه بالشوك محميه راح يسألها وهو يأسَان :{الساحر مالك الحزين طريقه منين؟؟} قالت له:{عايز منه ايه ارجع فى طريقك ،ايه اللي جابَك؟طريق البشر اشواك خليك طاير في سماك} إتغاظ الطنان وقال وهو أرفّان:{خليكي في شؤونِك ودوري على اللي يعونِك} قالت له :{ربي بيعولني ويعولَك..عمرك شلت هم اكل يومَك؟؟!لو رحت في طريق الشوك قلبك هيتملى شكوك واكل يومَك هتشيل همه وقت قيامك من نومَك ده غير تُقل حمولَك}قالها :{دليني على الطريق} قالت له:{اتبع الشوك هو هيوديك}.

فضل ماشي لحد ماوصل لبيت ابو قردان خبط على بابه وسأله

:{دلني على الساحر مالَك الحزين ابو بنْور ابو جراب مسحور} قاله:{هو ابن عمي وسبب همي خليك جنبي وانا هوصلَك ياعمي}

واخيــــــــراً

..وصل العصفور الطنان للساحر ابو بنْور ومن غير مقدمات قال على طول :{عايز اكون انسان} رد ابو بْنور:{طلبك مقبول..لكن..ان صممت تكون انسان عمرك ما تقدر ترجع طنان} رد الطنان :{وانا موافق كمان..وبدون شروط. يالا بسرعه فك الجرَّاب المربوط بسحرك المعهود وحقق المقصود}قال ابو بنْور :{ النصيحه واجِب عشان ما ترجعش تعاتِب}قال الطنان:{نصحوني كتير هو ده المصير}رد ابوبنْور:{عشان تتحول انسان لازم يكون البدر تمام وتجيب عصفور طنان من عيلتك تدبحه عشان تغير جنسك من طير لإنسان اصل المحبه في قلبهم مالها مكان}بص الطنان وهو حزنان بس دى الضريبه عشان يكون من بني الانسان
حس ابو قردان بتردد الطنان قام اقترح على ابوبنْور وقال:{يامالك الحزين يابو بنْور ياامير..ده عبيط مش عارف اللي راح يصير..خده في لمحه وطير لعالم البشر الشرير وبعدها يقرر واهو القمر لسه بدر ومعانا وقت}.

وافق ابو بنْور واخد الطنان وبكلمات سحريه قال

:{بنْور..بنْور..على عالم الانسان بلف وادور هنكون ذره هوا ماتبان ونكشف حياه الانسان لعصفورنا الطنان.. راح ينكشف المستور والمدفون تحت القبور وكل الوان الانسان هتكون في النور}.

اخده ابو بنور على قصر كبير

.فرح الطنان وقال:{الله!!ده بيت امير} ردابو بنْور:{قصدك فقير كتير}.استغرب الطنان وقال:{اكيد غلطّان}.ابو بنْور:{تابع وشوف وهتعرف الخفي المكشوف} .

شفت انسان وحيد غني ولبسه فريد

..وفجأه..!! نزل وفتح السرداب وقفل وراه الباب ..تبص جوه تلاقي اشكال على الوان إشي دهب وإشي جواهر كمان ده غير الفلوس المتعلقه على الحيطان بواكي بواكي والفكه لوحدها في صندوق تاني ولمحه الحزن اللي كانت على وشه اتحولت لسرور

قلت

:{يابخــــتُه اد ايه مبسوط}رد ابو بنْور وقال:{ماتــــتسرعش شوف باقى الاسرارالمستخبيه في القصر} .

دخلنا بقيه الغرف وشفنا اطفال صبيان على بنات وصراخ وعويل ، بكاء وخوف م اللي راح يصير وام مع اولادها رافعه ايدها وبتدعي على الغني امتي يموت وامتي راح يخلصوا من مانع القرش وسارق القوت

, م الجوع بيتلَّوا.بص لي ابو بنْور وقال:{ها عايز تكون زيه؟؟!شفت الانسان على فلوسه عامل غفير مع انه غني وقدير ده اصغر العصافير بتاخد من قوتها وتاكل بيه اولادها،لكن الانسان معدومه من قلبه الرحمه، اناني بطبعه كل اللي همه نفسه} رديت وقلت:{مش كل الناس زي الغني بفلوسه ابو قلب فقران}

قال لي ابو بنْور

:{يمكن ياعصفور، إمسك فيه كويس... هنروح لام مَندْور}.

سافرنا في سحب وتيارات واخيراً وصلَّنا للبيت اللي فيه مات ابو منَدْور ومراته مِن حسرتها عليه بتلف حوالبن نفسها ودور

.. وولاده زي النسور ..بيدوروا على الميراث وكل واحد عايز يخطف حته قبل ما يندّاس ،كل ده قبل مايدفنوا الاب اللي دمه لسه مابردش مش مقدّرين حاله الام اللي شريك حياتها فارقها وسابها لوحدها من غير حد يبقى سَندْها هيرموها في بيت مسنين او ينسوها حتى سنين.

سألني ابوبنْور

:{ايه رايك يا طنان} قلت له:{مش شرط اكون اب وعندي اولاد كمان، كفايه اكون شاب عندي آمال كتير احققها بقلب كبير}قال لي:{الشباب مش معناه السعاده ممكن يكون معناه شيل الهم زياده، وتُقل الاحمَّال لدرجه ان واحد منهم ممكن ينهي حياته في الحال} قلت باستغَّراب:{ده محال!!}.

وصلنا لجسر

.. بصينا على طرفه لاقينا شاب هيرمي نفسه !!هموم الدنيا خنقاه وحياته مش همّاه ،يأسه حطمه قرر يلّعن قدره ويلقى حتفه وينهي قيده واسره.

في حزن سألت

:{ليه وعشّان ايه يموت روحه بإيديه؟؟!!}جاوبني ابو بنْور وقال:{اصله خايف من بكره، اتَّكل على ذاته ومافكرش في ربه ..اللي بيأكل العصافير وكل شىء في الكون الكبير مع انه واقف حنبه ويقدر يزيل همه بس هو بعيد عنه وعايز كل حاجه تيجي عنده مش بيقدّر تعبه ومش صابر على ربه اللي بيمتَّحنه بقَّدرُه} صرخت وقلت:{خلاص ياعني مافيش انسان مبسوط وف سلام..ليه كده يارب الاكوان؟!}.

ابو بنْور

:{ياطنان قلت لك كده حياه الانسان،مشاكل في كل اوان..تعالى هخدك على انسان عايش في حاله ف سلام بس البشر بياكلوا في لحمه زي الغربان قلوبهم مليانه حسد وطمع كمان يعملوا مقالب في بعض فشَّر الحيوان وحتى اشر حيوان بالنسبه لهم غلبَّان ،يزعلوا لما غيرهم يكون مبسوط وعايش في امان، ده غير لعبه الكلام واشاعه هنا وهناك وسرقه وقتل ورشوه كمان}.رديت وقلت في حيره:{كفايه بقى دي السيره..!معقول يامالك الحزين يكون الانسان قد كده حقير ويأذي الغير..ده الديب عمره ماأذى اخوه الديب ولا عمر اسد قتل صا حبه ولا قرد غار من اخوه في عيله عايشين وعمرهم ما باتوا جعانين ولاعمر عصفور سرق حبه قمح م التاني ده الرب هو رازق الكل والغاني}.بص لي ابو بنْور وقال:{عرفت قصدي ياطنان ارجع لوطنك في الحال وقبل ماترجع هوريك عم سمعان الشيال اللي بيسَّموه ابو العيال وهتعرف لما تشوفه انك محظوظ وان الانسان عايش منبوذ}.

اتنَّــقلنا بين الشوارع لأماكن تشبه المزابل

..ووصلنا لبيت فقير كأنه إسطبل حمير،قاعد فيه عم سمعان مهموم وغلبَّان ،هدومه مقطعه وحيران بيكلم نفسه بصوت عالى زى اللي مسه الشيطان ومراته تشوفها زى الكلب السعران عماله بتجرى وراء عيالها بعصايه م الخيرزان،تشوف العصايه في ايديها تقولش شاويش دوريه ده غير ان بطنها تقولش شايلاه ميَّه بتضرب اولادها من همها وتطَّلع فيهم خلقها

وسمعان بيصرخ وهو حزنان:{ليه ياربي خلقتني انسان ياريتك خلقتني من عالم الحيوان او سمكه
اوضفدع غلبان او حتى من عالم الطير ..إنشاله حتى..عصفور طنان..ياريتك خلقتني عصفور طنان وماخلقتنيش انسان}.

بص ابو بنْور ساحر الطيور للعصفور الطنان وقال

:{شفت اد ايه بيتمنوا لو اتخلقوا عصفور طنان ياترى لسه عايز تكون من بني الانسان؟؟!}ساد لحظه صمت كسرها ابو بنْور لما قال وخوف العصفور:{...خلص وقتك معايا والقمر بقى بدر في النهايه هَفك جرابي المسحور وتتحول لانسان لما تِدور...}.

صرخ العصفور الطنان

:{لا..لا..لالالالالالامش عايز اكون من بني الانسان غابتهم شريره غابتنا بالنسبه لهم اميره ..عمر ماديب عمل ارنب ولا حيه لبست ثياب حمل ولا ثعلب عمل نفسه حمامه او جمل..حتى لو كنت صغيور انا مش خايف لامن صقور ولا نمور حتى الحدايه ارحم م الانسان على الاقل بنام وانا مش تعبان بفكر في بكره وقلقان ،عارف ان الديان مدبر لي إحتياجاتي بأمان في ليلي ويا نهاري عينه عليه كمان ولو لَّيه عُمر هعيش رغم الزمان مهما كانت فيه وحوش في غابتي انا قبلان ..رجعني ياابو بنور لبر الامان لزهرتي ورحيقي ولو ان النحله هتزعل من منقاري الجعان حابب ارجع اشم ريحه رب الاكوان وزهوره اللي على كل الالوان...اشكرك ياربي لانك خلقتني عصفور طنان وما خلقتنيش انسان}
* تمت *